Улаанбаатар
А.Гризманн Парисын Олимпод оролцох хүсэлтэй байна
ДЭЛХИЙН МЭДЭЭ | СПОРТ
ПАРИС, 2024 оны
хоёрдугаар сарын 22 /ESPN/. “Атлетико
Мадрид” клубийн франц довтлогч Антуан Гризманн “Парис-2024” Олимпын наадамд улс
орноо төлөөлөн оролцох хүсэлтэй байгаагаа илэрхийлжээ.
Францын Le Monde сонинд ярилцлага өгөх үеэрээ өөрийнхөө хүсэл зорилгыг тодорхой
илэрхийлсэн А.Гризманн энэ зун “ЕВРО-2024” тэмцээнд оролцох ёстой тул түүний хэлсэн үг клубийнх нь хувьд түгшүүр төрүүлэх нь ойлгомжтой.
Олимпын наадам долоодугаар
сарын 26-наас наймдугаар сарын 11-ний хооронд үргэлжлэх бол “ЕВРО-2024” зургаадугаар
сарын 14-нд эхэлж, сарын дараа финалын тоглолт болно. Ийм хуваарь
нь А.Гризманн болон бусад тамирчдын хувьд тэмцээнээс тэмцээний
хооронд тамир тэнхээгээ сэргээх тун бага хугацааг олгож байгаагаас гадна наймдугаар
сарын 17-нд эхлэх Ла Лигийн 2024-2025 оны улирлын эхний хэд хэдэн тоглолтыг
өнжихөөс аргагүйд хүрнэ гэсэн үг юм.
Гэсэн хэдий ч А.Гризманн
амьдралд ганц тохиох боломжийг алдахыг хүсэхгүй байгаагаа тайлбарлан ярьжээ. “Парис
хотод Олимпын наадам болж байгаа нь үнэхээрийн онцгой үйл явдал” хэмээн тэрбээр хэлсэн
байна. Өмнө нь тэрбээр “би өөрийнхөө биеийг мэднэ, бидэнд хамгийн шилдэг эмч
нар бий, санаа зовох шалтгаан огтхон ч байхгүй” хэмээн хэлж байв.
Олимпын наадамд оролцох багуудад гол төлөв 23 хүртэлх насны тамирчид багтдаг боловч нас хэтэрсэн гурван тоглогчийг оруулахыг зөвшөөрдөг бөгөөд А.Гризманн энэ зунаас өмнө “Реал Мадрид”-д очих гэж буй Килиан Мбаппегийн хамтаар Францын шигшээ багт тоглох магадлал өндөр байгаа юм.
