Монгол Улсын Их Хуралд ажлаа шууд хариуцан тайлагнадаг байгууллагуудын 2015 оны авлигын эсрэг үйл ажиллагаанд хийсэн үнэлгээний тайлан сэдэвт уулзалт өнөөдөр /2016.01.22/ Төрийн ордонд боллоо. 

Уулзалтыг нээж УИХы-ын Тамгын газрын Ерөнхий нарийн бичгийн дарга Б.Болдбаатар үг хэлэхдээ, УИХ-д ажлаа шууд хариуцан тайлагнадаг байгууллагуудын авлигын эсрэг үйл ажиллагаанд хийсэн хөндлөнгийн байгууллагын үнэлгээний тайлан танилцуулах арга хэмжээ 3 дахь жилдээ болж байна. Үнэлгээний дүн өнгөрсөн жилүүдийнхтэй харьцуулахад ахиц гарсан болохыг бид харж болно. Энэ нь байгууллагууд авлигын эсрэг үйл ажиллагаандаа санаачилгатай ажилласны үр дүн гэж харж байна гэлээ. 

Мөн Авилгатай тэмцэх газрын дарга, тэргүүн комиссар Н.Ганболд үг хэлэв. Авлигатай тэмцэх газраас Авлигын эсрэг хуулийн 18 дугаар зүйлд заасан улсын хэмжээнд авлигын эсрэг олон нийтийг соён гэгээрүүлэх, урьдчилан сэргийлэх ажлыг зохион байгуулах, үйл ажиллагааг нь уялдуулан зохицуулах, нэгдсэн хөтөлбөр боловсруулах, арга зүйн удирдлагаар хангах, хэрэгжилтэд нь хяналт тавих, Ашиг сонирхлын зөрчлөөс урьдчилан сэргийлэх тухай хуулийг төрийн байгууллага, албан тушаалтан хэрхэн дагаж мөрдөж байгааг хянах чиг үүргээ хэрэгжүүлэх, төрийн байгууллагаас хэрэгжүүлж буй авлигын эсрэг үйл ажиллагаанд үнэлэлт дүгнэлт өгөх зорилгоор тусгай аргачлал боловсруулсан болохыг дурдлаа. Үнэлгээний оноо жил бүр ахиж байгааг шинжээчид эерэг үзүүлэлт хэмээн үзэж байгааг тэмдэглээд, төрийн байгууллагуудын авлигатай тэмцэх үйл ажиллагаа сайжирч байгаа хэмээн үзсэн болохыг энэ үеэр хэллээ. 

Улсын Их Хуралд ажлаа шууд хариуцан тайлагнадаг байгууллагуудын 2015 оны авлигын эсрэг үйл ажиллагаанд хөндлөнгийн үнэлгээ хийсэн тайланг "Эм Ди Эс анд Хаан Лекс" хуулийн фирмийн партнер Д.Дүгэржав танилцуулав. Тус фирм энэ удаагийн үнэлгээнд Улсын Их Хурлаас байгуулагддаг 7 байгууллага, 15 яам, Засгийн газрын тохируулагч, хэрэгжүүлэгч 28 агентлаг болон бусад төрийн байгууллагын авлигын эсрэг үйл ажиллагаанд хөндлөнгийн үнэлгээ хийж, тайлан гаргасан байна. Үнэлгээний оноог гаргахдаа авлигын эсрэг хууль тогтоомжоор хүлээсэн үүргийн биелэлт, авлигатай тэмцэх санал санаачилгыг нь тусгайлан боловсруулсан аргачлалаар дүгнэжээ. 2015 оны үнэлгээнд Улсын Их Хуралд ажлаа шууд хариуцан тайлагнадаг 7 байгууллага хамрагдсанаас Сонгуулийн Ерөнхий хороо /86.4 оноо/, Үндэсний статистикийн хороо /79 оноо/ хамгийн өндөр үнэлгээ авсан бол Төрийн албаны зөвлөл /64.3/ хамгийн бага оноо авчээ. Улсын Их Хурлаас байгуулагддаг 7 байгууллагын 2015 оны дундаж оноо 74.2 байгаа нь бусад төрийн байгууллагуудаас харьцангуй өндөр үзүүлэлт болохыг "Эм Ди Эс анд Хаан Лекс" хуулийн фирмийн партнер Д.Дүгэржав тайлангийн танилцуулгын үеэр онцлож байлаа. 
Энэ нь 2013, 2014 онуудын үнэлгээний дүнд холбогдох асуудлаар Улсын Их Хурлын удирдлага, түүний Тамгын газрын зүгээс ихээхэн анхаарал тавьж, дээрх байгууллагуудын удирдлагатай тусгайлан уулзалт хийж, үнэлгээний аргачлал, дүнгийн талаар танилцуулж, чиглэл өгч ажилласны үр дүн хэмээн шинжээчид дүгнэжээ. Түүнчлэн Улсын Их Хуралд ажлаа шууд хариуцан тайлагнадаг байгууллагуудын авлигын эсрэг үйл ажиллагаа ахицтай байгаа нэг шалтгаан бол удирдлагын манлайлал, авлигатай тэмцэх эрмэлзэл бодит байдалд нөлөөлж байгаагийн сайн жишээ хэмээлээ. 
Шинжээчдийн баг Улсын Их Хурлаас байгуулагддаг байгуулгуудын 2015 оны авлигын эсрэг үйл ажиллагаанд хөндлөнгийн үнэлгээ хийхдээ төрийн байгууллагын цахим хуудас дахь мэдээлэл, тухайн байгууллагаас ирүүлсэн тайлан, нотлох баримтад тулгуурласан гэдгээ дурдаад Үндэсний аудитын газар аргачлалд тусгасан шалгуур үзүүлэлтийг бүрэн хангаж ажиллахад сөргөөр нөлөөлсөн нөхцөл байдлын талаар танилцуулав. Цаашид үнэлгээнд сөргөөр нөлөөлсөн дээрх асуудлуудад анхаарлаа хандуулахын зэрэгцээ "Төрийн байгууллагын авлигын эсрэг үйл ажиллагааг үнэлэх аргачлал"-д тусгасан шалгуур үзүүлэлтийг бүрэн хангаж ажиллах, 2016 оны авлигын эсрэг үйл ажиллагааны үнэлгээний дүнг өмнөх оныхоос дээшлүүлэхэд чиглэсэн зохион байгуулалтын арга хэмжээг авч хэрэгжүүлэхийг зөвлөсөн юм. Мөн уг тайланг цахим сайтад нээлттэйгээр байршуулсан гэдгийг дурдсан юм.  

Тус уулзалт асуулт, хариултаар үргэлжилсэн юм. Хүний эрхийн үндэсний комиссын дарга Ж.Бямбадорж, авлигын эсрэг үйл ажиллагаанд хөндлөнгийн үнэлгээ хийсэн тайлангийн талаар  зарим зүйлийг тодруулж, хариулт авлаа. Мөн Санхүүгийн зохицуулах хорооны дарга З.Нарантуяа  авлигын эсрэг үйл ажиллагаанд үнэлгээ хийдэг тусгай аргачлалыг боловсронгуй болох талаар санал хэлэв. 

Уулзалтад Улсын Их Хурлын Тамгын газрын Ерөнхий нарийн бичгийн дарга Б.Болдбаатар, Авлигтай тэмцэх газрын дарга, тэргүүн комиссар Н.Ганболд, Үндэсний аудитын газрын дарга А.Зангад, Хүний эрхийн үндэсний комиссын дарга Ж.Бямбадорж, Санхүүгийн зохицуулах хорооны дарга З.Нарантуяа болон Монголбанк, Сонгуулийн ерөнхий хороо, Төрийн албаны зөвлөлийн холбогдох албан тушаалтнууд, Улсын Их Хурлын Тамгын газрын ажилтнууд болон "Эм Ди Эс анд Хаан Лекс" хуулийн фирмийн төлөөлөл оролцлоо хэмээн Улсын Их Хурлын Тамгын газрын Хэвлэл мэдээлэл, олон нийттэй харилцах хэлтсээс мэдээлэв.