Баян-Өлгийн сурагчид "Шилдэг боловсролтой хамт олон"-оор шалгарчээ
ОРОН НУТГИЙН МЭДЭЭ | БАЯН-ӨЛГИЙ
Баян-Өлгий /МОНЦАМЭ/. Энэ сарын 14-17-ны өдрүүдэд Увс аймагт болсон баруун бүсийн орос хэлний олимпиадад тус аймгийн сурагчид амжилттай оролцож, "Шилдэг боловсролтой хамт олон"-оор шалгарчээ.
Монголоос ОХУ /ЗХУ/-д оюутан сургаж эхэлсний 95 жилийн ой болон Монгол-Оросын найрамдлын өдрүүдийн хүрээнд зохион байгуулагдсан орос хэл, соёлын бүсийн цогцолбор арга хэмжээнд Баян-Өлгий аймгаас 2 багш, 5 сурагч оролцсон байна.
Хоёр шаттай зохион байгуулагдсан уг олимпиадад онооны дүнгээр Дарын бүрэн дунд сургуулийн 12 дугаар ангийн сурагч С.Асел 1 дүгээр байр, Өлгий сумын 4 дүгээр бүрэн дунд сургуулийн сурагч Б.Ахмейр 3 дугаар байрт шалгарч, ОХУ-д үнэ төлбөргүй суралцах эрхийн бичгээр шагнуулжээ.
Түүнчлэн зохион байгуулагчдын зүгээс орос хэлний олимпиадад сурагчдаа амжилттай бэлтгэн оролцуулсан багш нарт ОХУ-д үнэ төлбөргүй мэргэжил дээшлүүлэх эрхийн бичгээр урамшууллаа гэж аймгийн Боловсрол, соёл, урлагийн газрын мэргэжилтэн У.Ботагөз мэдээллээ.
Ө.Нурболат