Үс засуулахад тохиромжгүй хэмээжээ

Монголын мэдээ | Лавлагаа
dusem11@yahoo.com
2020-11-26 08:20:28

Улаанбаатар /МОНЦАМЭ/. Өнөөдөр аргын тооллын 2020 оны 11 дүгээр сарын 26. Бархасвадь гараг. Билгийн тооллын XVII жарны "Хотолыг баригч" хэмээх Шороон хулгана жилийн өвлийн тэргүүн улаагчин гахай сарын Билгийн тооллын 12. Пүрэв гараг. Дэлгэрүүлэгч одтой, долоон улаан мэнгэтэй, харагчин тахиа өдөр.

 

Барилдлага: Үл зохилдох

Шүтэн барилдлага: Авахуй

Суудал: Уул

 

Өдрийн наран 8 цаг 14 минутад мандан, 17 цаг 05 минутад жаргана. Тухайн өдөр могой жилтнээ аливаа үйлийг хийхэд эерэг сайн ба үхэр, луу, хонь, нохой жилтнээ сөрөг муу нөлөөтэй тул элдэв үйлд хянамгай хандаж, биеэ энхрийлүүштэй. Эл өдөр архи уух, тамхи татах, сэтгэл муутантай нөхөрлөх зэргийг цээрлэх хэрэгтэй ба гарагийг тахих, хагалгаа хийлгэх, гэр бүрэхэд сайн.

 

Мод суулгах, нарийн зөвлөгөөн хийх, улаа гаргах, хиншүү хярвас гаргахад муу. Өдрийн сайн цаг нь хулгана, бар, туулай, морь, хонь, тахиа болой. Хол газар яваар одогсод баруун хойш мөрөө гаргавал зохистой. Хүүхдийн сэвлэг үргээлгэх буюу үс засуулахад тохиромжгүй хэмээжээ.

Холбоотой мэдээ