Улаанбаатар
216 тэрбум төгрөгийн ТБҮЦ арилжив
МОНГОЛЫН МЭДЭЭ | ЭДИЙН ЗАСАГ
Монголбанк өнөөдөр 1 долоо хоногтой 216 тэрбум төгрөгийн ТБҮЦ-ыг 12 хувийн жигнэсэн дундаж хүүтэйгээр арилжааллаа.
Ингэснээр 1 долоо хоногтой ТБҮЦ-ны үлдэгдэл 498.2 тэрбум төгрөг болов.
Нэг долоо хоногийн хугацаатай ТБҮЦ нь банкуудын нөөцийг удирдахад чухал үүрэг гүйцэтгэх бөгөөд Монголбанкны мөнгөний бодлогын үндсэн хэрэгсэл юм. Энэ төрлийн үнэт цаасны хүү нь Монголбанкны бодлогын хүү болох бөгөөд БХЗ дээр хөтөч хүүний үүргийг гүйцэтгэдэг. Анх тогтмол хүүтэй, борлогдох хэмжээ нь хязгаарлалтгүй байсан энэхүү үнэт цаасыг 2007 оны 7 дугаар сард анх нэвтрүүлж 7 хоног бүрийн Лхагва гаригт БХЗ дээр арилжаалах болсон нь банкуудын сонирхолыг ихэд татсан юм. Учир нь энэ төрлийн үнэт цаас нь банкуудад илүүдэл нөөцөө богино хугацаатай хүү өгдөг активт чөлөөтэй байршуулах боломж олгосон бөгөөд уг бүтээгдэхүүн нэвтэрснээр банкуудын нөөцийн удирдлагад мэдэгдэхүйц өөрчлөлт гарчээ.
Мөн өнөөдөр Сангийн яамнаас Монголбанкаар дамжуулан 40 тэрбум төгрөгийн Засгийн газрын урт болон богино хугацааны үнэт цаас борлуулахаар нийтэд мэдээлсэн ч иргэн, аж ахуйн нэгжээс худалдан авах санал ирээгүй байна.
Ч.Ариунболд
