Ulaanbaatar
ГОВЬ-АЛТАЙ: Зэвсэгт хүчний 341 дүгээр ангийг байгууллаа
ОРОН НУТГИЙН МЭДЭЭ | ГОВЬ-АЛТАЙ
Есөнбулаг, 2025 оны арваннэгдүгээр сарын 28 /МОНЦАМЭ/. Говь-Алтай аймгийн төв Есөнбулаг суманд Зэвсэгт хүчний цэргийн анги 11 дүгээр сарын 28-ны өдөр албан ёсоор нээлтээ хийлээ.
2014 онд аймгийн Засаг даргаар ажиллаж байсан, одоогийн УИХ-ын гишүүн О.Амгаланбаатарын санаачилгаар Говь-Алтай аймагт цэргийн анги байгуулах саналыг Улсын Их Хуралд өргөн барьж, батлагдсанаар энэхүү ажлын шав нь тавигдсан билээ.
Тэгвэл ийнхүү уг санаачилга бодит ажил болж, Зэвсэгт хүчний 341 дүгээр ангийг албан ёсоор байгуулж үйл ажиллагаа нь жигдэрч, цэргүүдээ хүлээн авч эхлээд байна.
Энэ хүрээнд Зэвсэгт хүчний жанжин штабын дарга, дэслэгч генерал С.Ганбямба өөрийн биеэр хүрэлцэн ирж, тус ангид байлдааны тугийг ёслол төгөлдөр хүлээлгэн өгч, цэргийн ангийн байрны нээлтийн ажиллагаанд оролцов.
Мөн тус ангийн нээлтийн үйл ажиллагаанд аймгийн ИТХ-ын дарга Л.Насанбуян оролцож, 12 сая төгрөгийн үнэ бүхий тоног төхөөрөмж, аймгийн Засаг дарга Г.Чинбат 27.5 сая төгрөгийн үнэ бүхий тоног төхөөрөмжийг тус тус гардуулан өгсөн юм.
