Ulaanbaatar
ДАШТ-ий сугалаанд Ираны төлөөлөгчид оролцохгүй гэв
ДЭЛХИЙН МЭДЭЭ | СПОРТ
ТЕХРАН, 2025 оны арваннэгдүгээр сарын 29 /France24/. Ираны төлөөлөгчдийн бүрэлдэхүүнд багтсан хэд хэдэн хүнд АНУ-д нэвтрэх виз олгоогүй учраас ирэх долоо хоногт Вашингтон
хотод болох хөл бөмбөгийн ДАШТ-ийн сугалааны ажиллагаанд Исламын Бүгд
Найрамдах Иран улс оролцохгүй гэж тус улсын хөл бөмбөгийн холбоо мэдэгдсэн
байна.
Tasnim News Agency агентлагийн мэдээлснээр,
ирэх сарын 5-ны өдөр сугалаанд оролцохоор төлөвлөсөн Ираны төлөөлөгчдийн ердөө дөрвөн
гишүүнд виз олгосон ба Ираны хөл бөмбөгийн холбооны ерөнхийлөгч Мехди Таж-д виз
олгохоос татгалзсан байна.
“Энэ шийдвэр нь спортын зарчмуудад огт нийцэхгүй гэдгийг бид ФИФА-д мэдэгдсэн бөгөөд ДАШТ-ийн сугалаанд Ираны төлөөлөгчид оролцохгүй” гэж Ираны хөл бөмбөгийн холбооны хэвлэлийн төлөөлөгч мэдэгджээ. Мөн Ираны хөл бөмбөгийн холбооны тэргүүн Мехди Таж ФИФА-гийн Жанни Инфантино-д хандан “виз олгохгүй гэсэн шийдвэр нь цэвэр улс төрийн сэдэлтэй бөгөөд АНУ ийм ааш авираасаа татгалзах ёстой” гэсэн байна.
ДАШТ-2026 анх удаа шинэ бүтэц зохион
байгуулалтаар АНУ, Канад, Мексик гэсэн гурван улсад явагдаж, 48 баг оролцох юм.
Ираны шигшээ баг Азийн бүсийн сонгон шалгаруулах тэмцээнээс ДАШТ-ий финалын шатанд шалгарсан билээ. Иранчууд
ДАШТ-д дөрөв дэх удаагаа дараалан оролцох гэж байгаа бөгөөд түүхэндээ нийт долоон
удаа финалын шатанд шалгарсан байна.
