Ulaanbaatar
ТӨВ: Яруу найргийн анхдугаар уралдаан зохион байгууллаа
ОРОН НУТГИЙН МЭДЭЭ | ТӨВ
Зуунмод, 2025 оны арваннэгдүгээр сарын 28 /МОНЦАМЭ/. Аргалант суманд Сүхбаатарын Батмөнхийн нэрэмжит "Уран өд" яруу найргийн анхдугаар уралдааныг 11 дүгээр сарын 26-нд зохион байгууллаа. Уралдаанд 5-12 дугаар ангийн 14 сурагч, төрийн албан хаагчид оролцлоо.
Эхний шатанд өөрсдийн зохиосон болон яруу найрагчдын шүлгээс уншиж сонордуулсан бол хоёрдугаар үед 'Монгол бахархал" сэдвээр шүлэг зохиож өрсөлдлөө.
Уралдаан нь хүүхэд, залуусын эх хэлний гайхамшиг, уран яруу хэллэг, үгийн баялгийг нэмэгдүүлэх, эх хэлний зөв хэрэглээг сайжруулах зорилготой юм.
Оролцогчдоос тэргүүн байрт 10а ангийн сурагч Г.Болортуяа шалгарсан бол төрийн албан хаагчдаас тэргүүн байрт ЕБС-ийн нийгмийн ажилтан Б.Мягмардорж шалгарчээ.
Энэ удаагийн яруу найргийн наадмыг анх удаа зохион байгуулж байгаа бөгөөд шүлэг зохиох сонирхолтой авьяаслаг сурагчид, төрийн албан хаагчид оролцсоноороо онцлог байгаа талаар шүүгч Аргалант сумын ИТХ-ын нарийн бичиг Р.Алтанзул хэлж байв. Мөн ирэх жил хүрээгээ тэлж бүсийн хэмжээнд зохион байгуулахаар болжээ.
Сүхбаатарын Батмөнх нь Төв аймгийн Аргалант сумын уугуул сэтгүүлч, зохиолч, яруу найрагч, улс төрч, соён гэгээрүүлэгч, анхны үндсэн хуулийг батлахад оролцсон юм.
