Мэрайя Кэри Австралийн тэрбумтантай сүй тавьжээ

ДЭЛХИЙН МЭДЭЭ | СОЁЛ УРЛАГ
jargal@montsame.mn
2016-01-22 14:56:19

ВАШИНГТОН. /АП/. Америкийн дуучин Мэрайя Кэри Австралийн тэрбумтан Жеймс Пакертай сүй тавьжээ. Хосууд хуримаа хийх өдрөө хараахан товлоогүй байна гэж TMZ цахим хуудсанд мэдээлсэн байна.

Пакер дурлалт бүсгүйгээ Нью-Йоркт болзоонд урьж, найзуудыг нь бас нууцаар дууджээ. Тэрбээр найзуудынх нь нүдэн дээр Мэрайя Кэрид гэрлэх санал тавьсан байна. Дуучин түүнийг саналыг сүйн бөгжний хамт хүлээж авчээ.

Мэрайя Кэри, Жеймс Пакер хоёр 2015 оны зургадугаар сараас болзож эхэлсэн байна. Хоёр хүүхдийнх нь эцэг, хоёр дахь нөхөр болох Ник Кэнноноос гэрлэлтээ цуцлуулах өргөдлөө өгснөөс хоёр сарын дараа Мэрайя Кэри Австралийн тэрбумтантай танилцжээ. Марайя Кэригийн анхны нөхөр нь дуу бичлэгийн хэд хэдэн компанийн эзэн Томми Моттол байсан бөгөөд поп-дива түүнээс 1998 оны гуравдугаар сард салсан байна.

Харин Пакер хоёр удаа гэрлэж байсан бөгөөд гурван хүүхэдтэй. “Forbes” сэтгүүл түүний хөрөнгийг 4.5 тэрбум доллароор үнэлжээ. Кэри өдгөө 45 настай бол дурлалт хархүү нь түүнээс гурван насаар ах аж.

Д.Жаргал

 

 

Связанные новости