“Дарханы мөнгөн өвөл” нэгдсэн үйл ажиллагаанд иргэд өргөнөөр оролцлоо

Орон нутагт | Дархан-Уул
174@montsame.mn
2018-01-02 13:18:04
Дархан-Уул/МОНЦАМЭ/.Хоёр он солигдох торгон заагт Дарханчууд Найрамдал талбайдаа цугларч баяраа тэмдэглэж эхлээд  олон жилийг үдэж байна. Энэ жилийн тухайд аймаг орон нутгийн удирдлагууд, төрийн болон хувийн хэвшлийн байгууллагууд хамтран Залуучууд театрын өмнөх “Найрамдал” талбайд мөсөн хотхон, мөсөн гулгуурын талбай, үлгэрийн баатруудыг сэдэвчлэн бүтээж Дарханчууддаа бэлэг барилаа.

Улиран одож буй 2017 оны хамгийн сүүлчийн өдөр болох 31-ний 21.00 цагт “Дарханы мөнгөн өвөл” нэгдсэн арга хэмжээний нээлт ёслол төгөлдөр эхэлсэн. Нээлтийн арга хэмжээнд УИХ-ын гишүүн Б.Жавхлан, аймгийн Засаг дарга С.Насанбат, аймгийн ИТХ-ын нарийн бичгийн дарга Р.Тунгалаг-Эрдэнэ, Дархан сумын Засаг дарга Б.Азжаргал болон бусад аймаг орон нутгийн удирдлагууд, албан хаагчид, иргэд оролцлоо.

Дарханчуудынхаа хүүхэд багачуудын төлөөлөл болж, үе тэнгийнхэн дотроосоо 2017 оныг өндрөөс өдөр амжилт бүтээлээр үдэж, Олон улсын болон Үндэсний аварга шалгаруулах тэмцээнээс шагнал авсан Ц.Орчлон, Э.Одбаяр, М.Удвал, Г.Есөн-Эрдэнэ, Г.Нандинсувд, Б.Бямбасүрэн, Б.Энх-Амар, О.Мөнхсүлд, Д.Анударь, М.Энхсайхан, Д.Удвал нарт өвлийн өвгөн шинэ жилийн бэлэг гардууллаа.

Мөн аймаг орон нутгийнхаа бүтээн байгуулалт, хөгжил дэвшилд бусдыгаа манлайлан оролцсон салбар салбарын зарим хүмүүсийг шагнаж урамшууллаа. Үүнд Төрийн албаны тэргүүний ажилтан цол тэмдгээр Ж.Цэцэгмаа, Соёлын тэргүүний ажилтан цол тэмдгээр Г.Энх-Од, Найрамдлын Дархан тэмдгээр Д.Балжинням, аймгийн Тэргүүний ажилтан цол тэмдгээр У.Баярмаа, А.Отгонбаяр, аймгийн Засаг даргын жуух бичгээр Э.Лхагвадулам нарыг шагнаж баяр дээр нь баяр нэмлээ.

Дарханчуудынхаа мэлмийг мялааж, Мөсөн хотхоныг байгуулсан “Дархан Төмөрлөгийн үйлдвэр”ХК, “Дархан Дулааны цахилгаан станц” ТӨХК, “Дархан Сэлэнгийн цахилгаан түгээх сүлжээ”ХК, “Цахилгаан дамжуулах үндэсний сүлжээ” ТӨХК, “Дархан ус суваг” ХК, Зэвсэгт хүчний 330 дугаар анги, Цагдаагийн газар, Онцгой байдлын газар, Шүүхийн шийдвэр гүйцэтгэх албаны хамт олонд талархал илэрхийлж аймгийн удирдлагууд хүндэтгэл үзүүллээ.
 
Л.Отгонбаатар
 
Холбоотой мэдээ