top banner

Ерөнхийлөгч Х.Баттулга Олон улсын Монгол судлалын холбоог дэмжиж ажиллахаа илэрхийлэв


2017-10-26 10:54:50
Зураг

Улаанбаатар /МОНЦАМЭ/. Олон улсын Монгол судлалын холбооны 30 жилийн ойд зориулсан хүндэтгэлийн арга хэмжээ Их тэнгэр цогцолборт өнөөдөр болов. Уг арга хэмжээнд Монгол Улсын Ерөнхийлөгч, Олон улсын монгол судлалын холбооны дэд ерөнхийлөгч Х.Баттулга оролцож үг хэллээ.

Тэрээр хэлсэн үгэндээ “Олон улсын Монгол судлалын холбооны 30 жилийн ой өнөөдөр тохиож байна. Та бүхэнд энэ өдрийн баярын мэнд хүргэе.

Монгол судлалын түүхтэй харьцуулбал 30 жил богино хугацаа юм. Энэ холбоо 1950-иад оны сүүл, 1960-аад оны эхэн хүртэл бас 30 гаруй жил дуншиж байж байгуулагдсан түүхтэй.

Монголын түүх бол Ази, Европын түүх гэж олон эрдэмтэн хүлээн зөвшөөрсөн байдаг. Үүгээрээ монголчууд бид бахархаж явдаг.

Олон улсын Монгол судлалын холбоотой би яагаад холбогдсон бэ гэвэл 2015 оны сүүлээр эрдэмтэн С.Чулуун болон бусад эрдэмтэдтэй ярилцаж, Монгол судлалын холбоог тодорхой хэмжээгээр ивээн тэтгэе. Боломжийн хэрээр тус дэм болъё, санхүүтэй холбоотой асуудлыг нь шийдье гэсэн юм. Ингээд энэ холбооны дэд ерөнхийлөгчийн албыг одоо хүртэл хашиж байна.

Бидэнд хийх ажил их байгаа. Эрдэмтэн С.Чулуунтай бид жудо бөхөөр бас холбогддог. “Та Монголын жудо бөхийг дэлхийд гаргасан юм чинь Монгол судлалын төвийг дэлхийд гаргамаар байна. Манайд Европ, Ази, Америкийн олон орны олон сайхан эрдэмтэн байдаг” гэж С.Чулуун хэлж байсан.

Би эрдэмтэн, судлаач, түүхчдийг дэмжихдээ их дуртай байдаг. Энэ хүмүүст материаллаг сонирхол байдаггүй. Гагцхүү эрдмийн ажил хийх үндсэн зорилготой хүмүүс учраас би дэмжие гэсэн. Надад бас хийх ажлын олон  санаа байсныг 2017, 2018 оны төлөвлөгөөнд оруулсан. Ази, Европ, Америк дахь монголч эрдэмтдийнхээ хурлыг тухайн газруудад нь жил бүр хийдэг болгоё. Хурал дээрээ Монголын талаарх эрдмийн ажлууд, тайлан илтгэлүүдийг шалгаруулж Олон улсын Монгол судлалын холбооны мөнгөн шагнал гардуулдаг байя. Ингэвэл эрдэмтэд урамшиж, шаргуу хөдөлмөрлөж, олон бүтээл хийнэ гэсэн санаа тусгаж, эдгээр ажлуудыг эхнээс нь хийгээд явж байна. Эдгээр ажлыг цаашид ч хийнэ.

 Монгол Улсын Ерөнхийлөгчийн хувьд Олон улсын Монгол судлалын холбоогоо цаашид ч дэмжиж ажиллана гэдгээ та бүхний өмнө дахин илэрхийлье.

Ийм сайхан материалтай, ийм түүхтэй улс орон олон байхгүй гэж би боддог. Монголгүйгээр ЕвроАзийн түүхийг бичихгүй гэдэг  нь  бидний өмнө байгаа маш их ажлыг тодорхойлж байгаа хэрэг.

Би өөрөө зураач мэргэжилтэй. УИХ-д сонгогдож, сайд болох хүртлээ явахад Монголын түүх судалсан маань их тус болсон юм.

Цаашдаа бид Монголын түүх, монгол судлалын холбоотой хамтран боловсролын системд Монголын түүх, монгол судлалыг түлхүү оруулах боломж бий гэж хардаг.

Өнөөдрийн даяаршлын ертөнцөд сошиал медиагийн давалгааг Монголын түүхээрээ саармагжуулах боломж бидэнд харагддаг.

Ингээд Олон улсын Монгол судлалын холбооны 30 жилийн ойд оролцож байгаа түүхч, эрдэмтэд, судлаачид та бүхэндээ дахин баяр хүргэе. Баярлалаа” гэв.



Монгол брэнд