Булган аймгийн хэмжээнд өндөржүүлсэн байдал тогтоолоо

ОРОН НУТГИЙН МЭДЭЭ | БУЛГАН
batjargal@montsame.mn
2018-09-11 10:31:10
Булган /МОНЦАМЭ/ Булган аймагт гамшгаас хамгаалах команд штабын сургууль зохион байгуулж байгаа учир аймгийн Засаг даргын захирамжаар аймгийн хэмжээнд  өчигдөрөөс эхлэн энэ сарын 14-ний өдрийг хүртэл гамшгаас хамгаалах өндөржүүлсэн байдлын зэрэгт шилжүүллээ.
Уур амьсгалын өөрчлөлт, хүн амын шилжилт хөдөлгөөн, өсөлт, төвлөрөлтийн улмаас тус аймагт тохиолдох аюулт үзэгдэл, ослын давтамж, учруулах хор хохирол сүүлийн жилүүдэд нэмэгдэх хандлагатай байна.  Тухайлбал, ган, зуд, гал түймэр, хүн, малын гоц халдварт өвчин, хүчтэй цасан болон шороон шуурга, үер, усны осол, газар хөдлөлтийн давтамж тогтмол тохиолдож байгаа юм. Зөвхөн энэ он гарсаар 60 гаруй удаагийн аюулт үзэгдэл, техникийн холбогдолтой осол тохиолдож, 8 хүний амь нас эрсэдсэн байна.
- Аюулт үзэгдэл, осол нэмэгдэж байгаа учраас гамшгаас хамгаалах сургууль дадлага хийдэг. Команд штабын сургуулийн нэг зорилго нь тухайн бүс нутагт тохиолддог болон тохиолдож болзошгүй аюулт үзэгдэл, осол, гамшгийн үед тухайн аймгийн нутаг дэвсгэрийг орон нутаг өөрийн хүчээр авран хамгаалах, сэргээн босгох боломж байгаа эсэхэд үнэлэлт дүгнэлт өгөх, гамшгаас хамгаалах төлөвлөгөөг турших, бодит нөхцөл байдал үүссэн нөхцөлд хариу арга хэмжээ авах чадвар эзэмшүүлэх, хүч хэрэгслийн бэлтгэл, бэлэн байдлыг дээшлүүлэх, ард иргэдийг гамшгаас хамгаалах үйл ажиллагаанд татан оролцуулахад чиглэгддэг. Команд штабын сургуулийн үеэр сургуулийн цагийн байдлын дагуу зарлан мэдээллийн дохиогоор ажиллах, гамшгаас хамгаалах хүч хэрэгсэл, бэлэн байдлын төлөвлөгөөг тодотгох, бүлгээр ажиллах, дадлага сургуулиуд зохион байгуулна. Дадлага сургуулиуд нь албад, аж ахуйн нэгж байгууллага, иргэдийн оролцоог бүрэн нэмэгдүүлэх, гамшгийн үед тухайн аймаг, орон нутагт тулгамдаж болзошгүй асуудлыг өөрсдөөр нь тодорхойлуулах, үүнийгээ биечлэн дадлага хийлгэн баталгаажуулах зорилготой гэж аймгийн Онцгой байдлын газрын орлогч дарга, дэд хурандаа Д.Ууганбаяр ярилаа.
М.Батжаргал
Холбоотой мэдээ