Улаанбаатар
БАЯНХОНГОР: Үе мөчний өвчин, арьсны харшилд бигнэж тавьдаг замагтай Өхэгийн рашаан
ОРОН НУТГИЙН МЭДЭЭ | БАЯНХОНГОР
Баянхонгор /МОНЦАМЭ/. Баянхонгор аймаг нь тал, хангай, говь хээрийн бүс хосолсон гурван бүсийн нутагтай, анагаах шидээр гайхагдсан рашаан ус олонтой нутаг. 95 хэм хүрдэг халуунтай дэлхийд хосгүй Шаргалжуутын рашаан, Өхэг, Хүрэмт, Халиут, Өргөөтийн рашаануудыг цувралаар танилцуулахаар бэлтгэлээ. Энэ удаад Өхэгийн рашааныг танилцуулъя.
Ходоод, чих, хамар, хоолой, бөөр, ядаргаа, үе мөчний өвчнийг анагаадаг Өхэгийн халуун рашаан Баянхонгор аймгийн Галуут сумын нэгдүгээр багийн нутаг Хангайн нуруунд байдаг.
Өхэгийн рашаан сувиллын газар нь Улаанбаатар хотоос 740 км, Баянхонгор аймгаас 110 км, Галуут сумын төвөөс 27 км зайд байрлана. Амралтын газрыг Өхэгийн рашааныг түшиглэн байгуулж, 22 өрөө, 55 ортой нэг ээлжиндээ 50-60 хүн хүлээн авах хүчин чадалтай юм байна. Амралтын газар нь эргэн тойрондоо уул ус, бүхий л төрлийн ховор эмийн ургамал, байгалийн өвөрмөц тогтоц бүхий дурсгалт газруудтай.
Уг рашаан нь газрын гүнээс хөрсний гадаргуу дээр гарч ирэх хүртэл төрөл бүрийн чулуулгийн ан цав жижиг нүх сүвээр дээшлэн олон төрлийн эрдэслэг бодис агуулсан анагаах хосгүй чанартай 20 гаруй төрлийн халуун, хүйтэн рашаантай. Рашааны халуун нь 38С-78С хэм.
Рашааны найрлагад кали, натри, сульфат, гидрокарбинат, хүхэр, устөрөгч, кальци, магни зэрэг 10 гаруй химийн элементүүдтэй. Рашааныг ходоод, элэг, цөс, уушиг, зүрхний өвчинд хүртдэг. Мөн нүд, бүх төрлийн харшил, үе мөчний өвчин, арьсны харшилд бигнэж тавьдаг улаан, шар, ногоон замагтай.
