Хашоггийн хэрэгтэй холбогдуулан хаан ширээнд суух эрхийг нь хасах бодолтой байна

ДЭЛХИЙН МЭДЭЭ | УЛС ТӨР
ayanzaya@montsame.gov.mn
2018-11-20 11:14:23

МОСКВА. /ТАСС/. Сэтгүүлч Жамаль Хашоггийн аллагатай холбоотой хэрэгт Саудын Арабын угсаа залгамжлах хунтайж Мухаммед бен Сальман Аль Саудыг буруутгаж байгаатай холбоотойгоор хааны гэр бүлийн гишүүд түүний хаан ширээнд суух эрхийг нь эсэргүүцжээ. Энэ тухай “Ройтерс” агентлаг гурван эх сурвалжийг иш татан мэдээлжээ.


Эх сурвалжуудын мэдээлснээр, хэдэн арван хунтайж болон үеэлүүд нь угсаа залгамжлах хунтайжийн хаан сэнтийд залрах явдалд саад учруулахыг завдаж байгаа аж. Өдгөө 82 настай хаан Сальман бен Абдель Азиз Аль Саудыг амьд сэрүүн цагт тэд ийм зүйл хийхгүй гэж “Ройтерс” агентлаг мэдээлсэн байна.


Нэгэн эх сурвалжийн мэдээлснээр, хааны гэр бүл  хаан Сальманы дүү, хунтайж Ахмедыг дэмжих бодолтой байгаа аж. АНУ-ын өндөр дээд тушаалын түшмэд ч мөн түүний угсаа залгамжлагч эрхийг дэмжжээ.


Угсаа залгамжлах хунтайж Мухаммед бен Сальманд хандах АНУ-ын хандлага зөвхөн сэтгүүлчийн амийг хөнөөсөн хэрэгтэй холбоотойгоор өөрчлөгдөөд зогсохгүй түүний Оросоос зэвсэг худалдан авах асуудлаархи байр суурьтай нь холбоотой аж. Угсаа залгамжлах хунтайжийн өнгөрсөн 5 дугаар сарын 15-нд батлан хамгаалахын яаманд бичсэн захидалд тэрбээр Оросоос зенитийн пуужингийн С-400 систем зэрэг зэвсэг худалдан авах асуудалд төвлөрөхийг БХЯ-наас хүсчээ.


Европын хаант засаглалтай дийлэнх улсуудын адил Саудын Арабт хаан ширээнд суух эрхийг том хүүд шууд шилжүүдэггүй аж. Угсаа залгамжлагчийг хаан болон түүний гэр бүлийн ахмад гишүүд сонгодог аж.

Холбоотой мэдээ