Эрдоган: Жамаль Хашоггийн амийг хөнөөх хэргийг урьдчилан төлөвлөсөн байсан

Дэлхийн мэдээ | Улс төр
nyamtulga@montsame.gov.mn
2018-10-23 18:14:16
twitter.com/Nyamkanmk

АНКАРА. /Anadolu/. Саудын Арабын сэтгүүлч Жамаль Хашоггийн амийг 10 дугаар сарын 2-нд хөнөөхөөр урьдчилан төлөвлөсөн байсан гэж Туркийн Ерөнхийлөгч Режеп Тайип Эрдоган мэдэгдлээ.


Туркийн эрх баригч Шударга ёс, хөгжлийн намын бүлгийн уулзалт үеэр тэрбээр Жамаль Хашоггийн амийг хөнөөсөн хэргийн мөрдөн шалгалтыг нарийвчлан танилцуулсан байна.


“Сэтгүүлч Жамаль Хашоггиг хөнөөх үйл ажиллагааг урьдчилсан төлөвлөсөн байсан бөгөөд үүнийг нотлох баттай баримт Туркт байгаа. Өнөөдрийг хүртэл цуглуулсан мэдээлэл, нотлох баримтаас үзвэл Жамаль Хашогги харгис гэмт хэргийн хохирогч болсон байна. Саудын Арабын баг бүрэлдэхүүн сэтгүүлчийн амийг хөнөөхөөсөө өмнө Истанбул хотын Белградын ой болон Ялова мужийн баруун хойд хэсгийг нягт судалсан байна” гэж тэрбээр мэдэгджээ.


Мөн тэрбээр, Венийн конвенц ийм аймшигт гэмт хэргийг хүлээн зөвшөөрөхгүй бөгөөд тус конвенцын нэг хэсэг болсон дипломат дархлааны асуудлыг хэлэлцэх болно гэж мэдэгдээд, хувийн зүгээс Жамаль Хашоггийн гэр бүлийнхэн, төрөл саданд нь эмгэнэл илэрхийлсэн байна.

Холбоотой мэдээ