Улаанбаатар /МОНЦАМЭ/. НЗД-ын захирамжийн дагуу 2018 оны 2 дугаар ээлжийн цэрэг татлагыг энэ сарын 19-21-ний өдөр 9 дүүрэгт зохион байгуулна. Цэрэг татлагын өргөтгөсөн товчоо хуралдаж, цаг үеийн асуудал, бэлтгэл ажил зэргийг хэлэлцэн Цэргийн Штабын дарга үүрэг чиглэл өгөв.

НЗДТГ-ын Цэргийн штабын орлогч дарга, хурандаа Ц.Анхбаяр Нийслэлийн цэрэг татлагын товчооны гишүүд дүүргийн цэрэг татлагын товчоонд ажиллах хуваарь, цэрэг халалт, татлагын бэлтгэл ажилтай танилцсан тайланг танилцуулав. Энэ удаагийн цэрэг татлагаар орох залуучуудад цэргийн зарлан дуудах мэдэгдэл бичиж тарааснаас 95.9 хувийг хүргэсэн талаар дурдав.

НЭМГ-ын дарга Л.Төмөрбаатар Нийслэлийн цэргийн насны залуусын эрүүл мэндийн үзлэг, эрүүлжилтийн талаар танилцуулав. Тэрбээр, “Энэ оны эхний ээлжийн цэрэг татлагаар 13542 иргэн эрүүл мэндийн үзлэгт орсон. Үүнээс 4801 буюу 35.5 хувь нь эрүүл мэндийн шалтгаанаар тэнцээгүй. Тэдний 3871 иргэнийг эрүүл мэндийн байгууллага хяналтанд авч эмчилгээнд хамарч байгаа. Өвчний оношоор нь авч үзвэл мэс засал, гэмтлийн 29.9, чих хамар хоолойн 13.2, Зүрх судас, дотор эрхтний 13 хувь зэрэг эрүүл мэндийн шалтгаан зонхилж байна” гэв.

Мөн Нийслэлийн хэмжээнд цэргийн насны залуусын “Эрүүл мэнд- Цахим бүртгэл” хөтөлбөр хэрэгжүүлж буй талаар танилцуулав.

Уг мэдээллийн сангаар дамжуулан цэргийн насны иргэдийн өвчний түүх, эмчийн болон цэрэг татлагын бүртгэл, хувийн мэдээлэл зэргийг бүрдүүлж алдаатай мэдээллийг засварлан, нэгдсэн бүртгэлтэй болох юм. 

НЗДТГ-ын Цэргийн штабын дарга, хурандаа Ж.Болдбаатар, "Батлан хамгаалах салбар цэргээс халагдсан залуусыг ажлын байртай болгох тал дээр анхаарч ажиллаж байна. Ажил олгогчдод явуулсан ажлын байр олгохыг хүссэн саналыг 32 байгууллага хүлээн авснаар халагдсан цэргүүдийн 2100 нь ажилтай болох боломж бүрдсэн” гэв. Мөн үүний дараа дүүргүүдийн цэрэг татлагын товчооны дарга нарын бэлтгэл ажлын явцыг сонсов. Бүх дүүргийн хувьд бэлтгэл ажил 90-ээс дээш хувьтай хангагдсан байна.

Мөн тэрбээр хурлын төгсгөлд  дүүргүүдийн цэрэг татлагын товчоодын удирдлагуудад үүрэг чиглэл өгөв. Үүнд:

- Цэрэг татлагын ажлыг энэ сарын 19-21-нд зохион байгуулахдаа хууль журмын хүрээнд, цаг, хугацааг тооцож, сахилга зохион байгуулалтын өндөр түвшинд явуулах

- МУЗГ-ын 2017 оны 144 дүгээр тогтоол “Иргэнийг цэргийн жинхэнэ албанд эрүүл мэндээр тэнцүүлэх заавар”-ыг баримтлан цэрэгт татсан иргэдийн эрүүл мэндэд анхаарах, “Эрүүл мэнд-Цахим бүртгэл” төслийг хэрэгжүүлэн мэдээллийн санг баяжуулж, дүүрэг хороодтой уялдаатай ажиллах

- Цэрэг татлагын товчооны томилгоот бүрэлдэхүүн энэ онд техникийн үзлэгт орсон, дүүргийн замын цагдаагийн тасгаас зөвшөөрөл авсан автомашинуудыг сонгон авч батлагдсан маршрутын дагуу цэрэг хүргэх, тээвэрлэх

- Дүйцүүлэх албаны мөнгөн төлбөрийн хэлбэрээр орлуулан хаах ажлын хэрэгжилтэнд анхаарах (МУЗГ-ын энэ оны 102 дугаар тогтоолоор 5 сая 70 мянга болсон)

- Цэргийн жинхэнэ албаны талаар иргэдээс ирж байгаа өргөдөл, санал , хүсэлт, гомдлыг бүртгэн хуулийн хүрээнд шийдвэрлэх

- Цэрэг татлагаар баримт бичгийн бүрдүүлэлт, зурагжуулалт, нөхөн бичилт, шилжүүлгийг бүрэн хийх

- Цэрэг татлагаар цаг уур хүйтэн байх тул иргэдийг дулаан байраар тав тухтай байдлыг хангах

- Нийслэлийн Цэрэг татлагын товчооноос томилогдсон албан тушаалтнууд дүүргүүдийн цэрэг татлагын байруудыг энэ сарын 18-нд 15.00 цагт өөрсдийн биеээр үзэж хүлээж авах

- Цэрэг татлагын үеэр өдөр бүр 20.00 цагт Нийслэлийн цэрэг татлагын товчоонд мэдээ хүргэх зэрэг үүрэг чиглэл өгөв.