“Флоренс” хар салхинд Монгол иргэн өртөөгүй гэв

МОНГОЛЫН МЭДЭЭ | НИЙГЭМ
ariunbold@montsame.gov.mn
2018-09-19 16:08:11

Улаанбаатар /МОНЦАМЭ/. АНУ-ын Зүүн  эргийн Хойд Каролин, Өмнөд Каролин, Виржини зэрэг мужид болж буй “Флоренс” хар салхины улмаас 2018 оны 9 дүгээр сарын 18-ны өдрийн байдлаар 32 хүн амь үрэгдэж, 500 гаруй мянган иргэн, бизнес эрхлэгчид орон байргүй болж, урьдчилсан тооцооллоор 10 тэрбум ам.долларын хохирол учирчээ.


Хар шуурганд нэрвэгдсэн Хойд Каролинд 752 мянга, Өмнөд Каролинд 119 мянган иргэн цахилгаангүй болоод байгаа бөгөөд иргэдийг нүүлгэн шилжүүлэх ажиллагаа үргэлжилж байна. Вашингтон дахь ЭСЯ-наас ГХЯ-нд хар салхинд өртөж хохирсон Монгол иргэн байхгүй гэдгийг мэдэгджээ.


АНУ-ын Ерөнхийлөгч Д.Трамп “Флоренс” хар шуурганд өртөөд байгаа мужууд нь байгалийн гамшгийн хэмжээнд хүрсэнийг зарлаж, яаралтай нэмэлт санхүүжилт олгож, 100 нисдэг тэрэг, 6 сая бэлэн хоол, 4 сая литр цэвэр ус, 730 мянган хөнжил зэрэг тусламж үзүүлэхээр болсноо мэдэгдэв. “Флоренс” хар шуурганы улмаас эрэг дээрх усны түвшин эрс нэмэгдэж, бороо их хэмжээгээр орж байгаагаас хөрсний гулгалт, үер болох магадлал өндөр байгааг АНУ-ын орон нутгийн засаг захиргаанаас иргэдэд анхааруулж байна.




Холбоотой мэдээ