Хилийн 0184 дүгээр ангийг Цэргийн гавьяаны одонгоор шагнав

МОНГОЛЫН МЭДЭЭ
ariunbold@montsame.gov.mn
2015-09-11 12:02:12

Чөлөөлөх дайны ялалтын 70 жилийн ойг тохиолдуулан Ерөнхийлөгч Ц.Элбэгдорж Сүхбаатар аймгийн Онгон сум дахь Монгол Улсын баатар Чойн Дугаржавын нэрэмжит Хилийн 0184 дүгээр ангийг Цэргийн гавьяаны одонгоор шагнасныг өчигдөр буюу энэ сарын 10-нд Ерөнхийлөгчийн Тамгын газрын дарга П.Цагаан гардуулав.

Шагнал гардуулах үеэр Ерөнхийлөгчийн Тамгын газрын дарга П.Цагаан, “Чөлөөлөх дайнд оруулсан ахмад үеийнхний хичээл зүтгэлээр Монгол Улс туурга тусгаар улс гэдгээ өнгөрсөн зуунд бататгаж чадсан билээ. Энэ их үнэ цэнийг бүтээхэд хилчдийн оруулсан хувь нэмрийг үнэлж төрийн шагналыг та бүхэнд хүртээж байна. Ирэх жил түүхт 80 жилийнхээ ойг тэмдэглэн өнгөрүүлэх Онгоны отрядын хамт олон Чөлөөлөх дайнд ЗХУ-ын Армийн генерал И.А.Плиевийн удирдлаган дор харийн түрэмгийлэгчдийн эсрэг тэмцэж явсан баатарлаг гавьяатай. Тиймээс ч түүхэнд гүйцэтгэсэн үүрэг, үе үеийн хилчдийн улсын хил хамгаалалтад оруулсан үнэтэй хувь нэмрийг үнэлж Цэргийн гавьяаны одонгоор шагнасан” гэлээ.

Одон гардуулах ёслолд Монгол Улсын Ерөнхийлөгчийн Тамгын газрын дарга П.Цагаан болон ХХЕГ-ын дарга, хошууч генерал Ш.Лхачинжав, Сүхбаатар аймгийн Засаг дарга Ж.Батсуурь тэргүүтэй төлөөлөл оролцов.

Ч.Ариунболд

関連ニュース
コメント