Өдөр тутмын хэрэгцээ болсон будааг уутаар нь авч хэрэглэсэн айл будаанаас нь хорхой гарч эхэлснийг саяхан мэдсэн байна. Ямар гээч хорхой нь үл мэдэгдэх энэ амьтан будаа дотроосоо хүртэл гарч ирж байгаа бөгөөд амьд төдийгүй хорхойноос гадна хог шороо ихтэй эл будааг уг хэрэглэсэн айл нь аймгийн төвийн томоохон хүнсний дэлгүүрээс авчээ.
Үүнээс өмнө будаан дотроос будааны цох хорхой гарч байсан удаатай. Гэтэл энэ удаагийн будаанаас гарч байгаа хорхой цаанаа л нэг хүний зэвүү хүрмээр эвгүй амьтан байв.Урд хөршөөс л будаагаа авч хүнсэндээ хэрэглэдэг бидний хувьд энэ мэт хичнээн ч хорхой шавьжийг хоолтойгоо хольж, хэдэн ч хүн идэж байгаа юм бүү мэд. Мөнгөө л авч байвал юу зарж байгаагаа сайн мэддэггүй хүнсний дэлгүүрийн эзэд ч энэ тал дээр сайн анхаарахгүй бол иргэд, хулалдан авагч нар л хохирч үлдсээр байна.
Будааг худалдан авсан өндөр настан н.Тэрбишээс тодруулга авлаа.
-Таны авч хэрэглэсэн будаан дотроос хорхой олноор гарчээ. Аль дэлгүүрээс авсан бэ? Хэдий хугацаанд мэдэхгүй хэрэглэсэн бэ?
 - 9 дугаар сард авсан. Ам бүл цөөтэй болохоор бид нэг уут будааг их удаан иддэг. Уржигдар анх мэдсэн. Эхлээд хоёр амьтан гарч ирэхээр нь авч хаячихаад л хоол хийгээд идлээ. Гэтэл өнөөдөр үдийн цайгаа чанах гээд үзтэл маш олон амьтан арзагналдаж байхаар нь аваад ирлээ дээ.Миний хувьд хүнснийхээ ихэнх бүтээгдэхүүн, будаа зэргээ хил явдаг найзаасаа авчихдаг юм. Энэ удаа төвийн дэлгүүрээс 25 кг-ын улаан ууттай будаа авч хэрэглэсэн. Одоо 5-6 кг үлдснээс энэ хорхойнууд гарч ирээд байгаа юм.
-Хорхойг харж байхад будаа өөрөөс нь гарч ирээд байх шиг байх юм?
-Энэ будааг хар даа. Будааны тэн хагасаас хорхойны бөгс цухуйж байх жишээтэй. Ёстой сонин юм даа хүүхэд минь. Будаанд нь үрждэг юмуу яадаг юм? Хятад Улс их чийглэг уур амьсгалтай болохоор будаандаа үрждэг байж магадгүй юм.Үүнийг мэргэжлийн байгууллага, лаборториуд үзэж шинжилж, дэлгүүрүүдийг дахин ийм хүнс будаа зарахаас сэргийлж, орж гарч байгаа хүнсний бүтээгдэхүүнийг үзэж харж өгөөч ээ гэж хэлмээр байна.
Холбогдох хяналт шалгалтын байгууллагууд хүнсний бүтээгдэхүүнийхээ тал дээр анхааралтай хандахгүй бол будаан дотор чинь амьд сэрүүн хорхой дураараа гүйлдэж явна. Амьдрал тааруу, хэнэггүйхэн хичнээн ч айл өрхүүд хорхойг түүж хаячихаад зооглож байгааг үгүйсгэх аргагүй. Өмнөговь аймгийн хувьд нэг бус удаа будаанаас нь өт хорхой гарч ирж байгаа бөгөөд худалдан авагчид, дэлгүүрийн эзэд, мэргэжлийн байгууллагууд будааны хадгалалт, хамгаалалт, сав уутны бүрэн бүтэн байдал гээд хүнсний аюулүй байдлын бүхий л тал дээр анхаарлаа өндөрсгөхгүй бол хоол ундны хамгийн чухал хэрэглээ болсон будаа иймэрхүү байдалтайгаар ард түмний хүнсэнд очсоор байна.